TÛKCHHUAH LEH TÛK CHHUAH HMANNA

TÛKCHHUAH LEH TÛK CHHUAH HMANNA

*'TÛKCHHUAH' LEH 'TÛK CHHUAH' MAW!*

1. TÛKCHHUAH:- Hetianga ziah zawm a nih hian, 'tûkchhuak' modified form a ni e an ti a, verb-ah an ngai ta a ni. Tichuan, "Tûkchhuah nuam u," an tih hian, "Zin nuam u," tih ang țawngkam angah hian an ngai a, 'tûkchhuah' hi verb-ah an hmang a ni.

Mizo țawnga verb thumal kan pi leh puten min lo chhersak reng reng hi, an tlatna tur hmun țawngkam dangah pawh verb an ni chat chat thei vek a ni. 'Tûkchhuah' hi a root word 'tûkchhuak' leh a modified form 'tûkchhuah' siam hrang hial khawpin verb thumal dik tak angin an cheibawl a. Hetiang taka verb dik taka an chhuah tâk si-ah chuan, a tlatna tur mualah țawngkam hrang hrangah verb-ah chuan han hmang kual chhin dawn teh se. Mat vuaka Tlawng dap pawh an tluk lo ang.

1) Naktuk chu rawn 'tûkchhuah' ang che u aw.
2) Zing sumo-a 'tûkchhuah' kan tum a.

Verb-ah han hmang dawn ila, nuih pawh a za lo, Mizo țawng hmangaihtute hi kan țah a chhuak!

2. TÛK CHHUAH:- Țhenkhatin hetiang hian an ziak hrang ve thung a. Heta 'tûk' mal din hi noun a ni a, 'chhuah' hi verb a ni ta thung. Noun thumal hi verb-in a zui reng reng chuan, kha noun tlatna muala verb dang reng reng pawh khân rawn zui sela, țawngkam dik a ni chat chat vek ang. Entir nan:-

1) Kan rawn 'zing chhuah' ang.
     Kan rawn 'tûk chhuah' ang.

2) Ka rawn 'zing lên' ang e.
    Ka rawn 'tûk lên' ang e.

3) 'Zing tho' tlai.
    'Tûk tho' tlai...adt.

Noun mal din, an awmna muala verb dang dangina a zui theih ve miah loh hi a lawnga hman chi a ni ve lo. 'Tûk' hi chu amah qualify-tu suffix 'in' leh adjective-te nena hman chi chauh a ni.

Mizo țawng kalphungah dik mawi lutuka 'tûk' hman theih na ná nâ, Mizo țawng pawh ang pha lova hmang luih hi a zahthlak a. Chutiang zingah chuan Mizo țawng zirna lam hawi group hrang hranga grammar leh Mizo țawng intithiam fe fe an tel ve bawk hi a zahthlak lehzual a ni.

1) 'Tûkin' chu ka tho nuam.
2) Kan tan chuan 'tûk hlimawm' tak a ni e.
3) 'Tûk pum' maia mut loh tur.
4) 'Tûk tin' hmai ka phih.
5) 'Nimin tûk' khân kha ka zing zin daih a.
6) 'Pathianni tûk' hi chu ka tho hma ve tlat zel.

Noun thumal 'tûk' hi chu khitiang khian amah qualify-tu suffix 'in' emaw, adjective emaw, nounal adjective emaw nena hman kawp chi chauh a ni e. Mizo țawng awmzia leh grammar kalphung hi man ila, mahni ngaih dan mai maiin râk râk lo ang u. A zahthlak!