CHHINCHHIAHNA (PUNCTUATION) CHI HRANG HRANGTE

*CHHINCHHIAHNA (Punctuation) CHI HRANG HRANG:*

1. *Comma(,)* : Hei hi thu sawi/ziah kal lai sawi zawh hmaa chawlh hlekna tur chhinchhiahna a ni a,  chawlhna tàwi ber a ni.

2. *SemiColon(;)* : Hei hi kan thu ziah, ṭawngkam kim thawkhat; mahse, sawi zui deuh la ngâi deuh a hman chi a ni. Comma(,) aia rei deuh hlek chawlh tur a ni.

3. *Colon(:)* : Kan thu sawi tur kamkeuna emaw, sawi tur tak nena inkar daidànna atana hman ṭhin a ni.

4. *Full stop(.)* : Hei hi thu ziak tawpna chhinchhiahna a ni. Chawlhna rei ber a ni bawk. Kan thu ziah te hi a sei emaw, a tawi emaw zawhna chhinchhiahna (?) leh makna(!) a awm a nih loh chuan Full stop dah ngei ngei tur a ni.

5. *Dot & Point* : Dot leh point te hi Full stop nen a chhinchhiahna inang reng mah se, a hming a dàn ang tho hian a hman hun pawh a dang tih hriat tur a ni. Thil eng pawh a indawt dana kan ziah, number kan pek zawh chiah hian dot(.) hi dah ṭhin tur a ni. Ni leh thla daidan nan te, pawisa leh a nawi daidan nan te leh decimal number hma chiahah te dah ṭhin an ni bawk.

6. *Khungna(" ")* : Mi thu sawi, sawi chhawn lehin emaw, lâk chhawn lehin chhinchhiah nan hman tur a ni.

7. *Khungna tè(' ')* : Mi thu sawi, sawi chhawn nawn lehna chhinchhiahna a ni.
Entirna: Rebeki chuan, "Pu Zika'n, 'Uniform hâk loh tur' a tih avangin a ha lo", a ti.

8. *Zawhna(?)* : Thu reng reng kan ziahin; zawhna kan siam tawpah hman tur a ni.

9. *Makna(!)* : Thu min ṭhawng thut, a ṭha lam emaw, a chhe lam pawh ni se, lawmna, hlimna, mak tihna, hlauhna, rapthlâk tihna, pawi kan tihna, hê'ng zawng zawng chhinchhiahna atan hian makna(!) hi hman tur a ni.

10. *Hyphe(-)* : Thu pahnihn zawmna leh daidanna atan hman ṭhin a ni.

11. *Dash(__)* : Hei hi colon nen a inzùl hle a, hman pawlh ṭhin a ni. Kan thu sawi tur kamkeuna tawpah dah ṭhin a ni a, hyphen nen ngaih pawlh loh tur a ni.

12. *Kualkhungna(braket) ()* : Kan thu sawi leh ziak, ngaih sual leh chhiar sual a awm lohna tura a tifiahtu atan ṭawng dang emaw, Mizo ṭawng tho kan kualkhung ṭhin hi a ni.

13. *Tlukna (=)* : Hei ve thung hi chu chhiarkawp lamah hman a ni deuhva, thil intluk leh inzat chiah chhinchhiahna a ni.

14. *Hawrawp bànna(Apostrophe) (')* : Hei hi thu ziak pahnih khat kan bàn chhinchhiahna a nih bakah chu kan bàn tâk hawrawp aiawhtu atan hman nghal a ni.

15. *Ditto(")* : Hei hi a chung chiaha thu ziak nen a inang tih chhinchhiahna a ni.

Entirna: 1. Sawma Tut.
               2. Sawma    "

16. *Thlûkna (^)* : Hei hi thu kan thlûk changa a hawrawp kengtu vowel - a, aw, e, i, u chungah dah ṭhin an ni.

à, ê, áw, î, û adt.

17. *Oblique (/)* : Thu kan daidanna chi khat tho niin, ni leh thla leh kum daidanna atan te, pawisa, figure-a kan ziahin pawisa a ni tih hriat nan hyphen nen kan hmang kawp bawk ṭhin.

Entirna:
₹25/-

26/09/2019.