COMPOUND NOUN CHI THUMTE

.

     *COMPOUND NOUN CHI THUM*

              - P.C.Thangzikpuia.
             (18 January 2018)

'Compound noun' awmzia chu; thumal pahnih emaw, a aia tam emaw hmanga thil sawina hming (noun) kan siam ang chi hi a ni. Chûng compound noun chu chi thumah ṭhen a ni a.

1. *SOLID (CLOSED) COMPOUND NOUN:*- Hei hi thumal pahnih emaw, a aia tam emaw ziah zawma noun thumal pakhata kan chher belhbawm ang chi hi a ni.

ṭhutthlèng.
kekawr
bungrua
awngphah...adt.

Khita a hmasa zâwkah khian thumal pahnih 'țhut' leh 'thlêng' kan kai kawp a, noun thumal pakhat kan nei ta a. A hnuai zawkah khian thumal pathum, 'ke' leh 'kawr' kan kai kawp a, noun thumal pakhat kan nei ve leh ta a ni. Khitianga thumal hrang pahnih emaw, a aia tam emaw ziah zawma noun thumal pakhat atana kan chher tâk ang chi hi 'Solid (or closed) Compound Noun' tia vuah a ni ta a ni.

2. *OPEN (SPACED) COMPOUND NOUN:*- Hei hi thumal hrang pahnih emaw, a aia tam emaw hmanga noun kan siam ang chi; amaherawhchu, ziah zawm ve chi ni si lo a ni ta thung a.

bâwng in
vawk sa
rangkachak bengbeh
Vana Pa Hall
Kristian Ṭhalai Pâwl...adt.

Entirnaa a hmasa zawkah khian thumal pahnih, 'bâwng' leh 'in' an inkawp a, noun pakhat a lo ni ta a. A hnuaiah khian thumal pathum, 'Kristian' leh 'țhalai' leh 'pawl' an inkawp a, noun pakhat a lo ni ve leh ta a. Hetianga thumal pahnih emaw, a aia tam emaw inkawpa noun kan siam, ziah zawm ve chi si loh hi 'Open (or Spaced) Compound Noun' tih a ni ta a ni.

3. *HYPHENED COMPOUND NOUN:*- Hei pawh hi thumal pahnih emaw, a aia tam emaw inkawpa noun kan siam, ziah zawm chi ni lo; mahse, open compound noun anga ziah hran ve chi ni chiah bawk si lo, thaiphei (hyphen) hmanga kawh zawma fuh zawk ang chi hi a ni ve ta thung a.

tual-sum-sù
puan-sûk-khâwl
se-ki-buh-chhuak
rappui-chung-sâng...adt.

Khita a hmasa zâwkah khian 'tual' leh 'sum' leh 'sù' khi thaiphei hmangin kan kawh zawm a, noun-ah kan siam ta a. A hnuaiah khian thumal pathum, 'puan' leh 'sûk' leh 'khâwl' khi thaiphei hmangin kan kawh zawm a, noun-ah kan siam leh ta a. Khitianga thumal hrang pahnih emaw a aia tam emaw, hyphen hmanga kawh zawma noun-a kan siam zawm tâk ang chi hi 'Hyphened Compound Noun' tia sawi a ni ve leh ta a ni. Hyphenated compound noun tur chi hi a awm hranpa chuang lo a; thumal atana ziah zawm chi ni lo, open compound noun atana ziah hran dâwna awmze dang a kawh palh ven nâna hyphen hmanga kawh zawm tâk ang chi hi an ni.

°°°