'MI' LEH 'MIN' HMAN DAN TUR:

.

             *'MI'  LEH  'MIN'  DAN.*

.             - PC.Thangzikpuia.

*'Mi'* leh *Min'* chungchâng hian sawi ho a hlawh ve ngiang mai a, *"Mi'* hi first person pronoun (singular) a ni a, *'min'* hi first person pronoun (plural) a ni," tih hi sawi fiah dân tlânglâwn a ni deuh tawrh mai țhin a. Mahse, keini erawh chuan a pahnih hian singular leh plural an ni kawp ve ve a, kan thu chheh dânah hman zawk tur a awm hrang țhin mai zawk a ni tih hi kan sawi ve thung dawn a ni.

_1) *Mi* han pe teh._
_2) *Min* han pe teh._

Khitah khian _*mi*_ leh _*min*_ khi keimah chauh ka insawina, first person (singular)-a ka hman khian a dik ve ve a ni.

_1) I *mi* han tih dân chu!_
_2) An *mi* han tih dân chu!_

Khitah khian second person (singular) _*i*_ ka hmanna leh, third person (plural) _*an*_ ka hmannaah khian keimah chauh ka insawina, first person (singular) _*mi*_ ka hman khian a la dik ve ve bawk. 

_3) Sikul naupang-hovin *min* rawn kan._

Khi țawngkamah khian keimah chauh ka insawina ni mah sela, _*min*_ hman a ngai ta tlat a, a chhan chu; *naupangho* tih khi plural ni mah sela, personal pronoun (plural) _*an*_ a awm ve loh avangin, thil titu *naupangho* khi pakhat aia tama lantir tur chuan plural form atan _*min*_ khi hman a ngai ta a; _*mi*_ hman a dik ta tlat lo.

_4) Sikul naupang-hovin *mi* an rawn kan._

Khitah khian mi pakhat aia tam, *naupang-hovin* keimah chauh min rawn kan thu ka sawina tho a ni. Mahse, _*mi*_ hman a dik ve leh ta zawk tlat thung. A chhan chu; third person-ah khian personal pronoun (plural) _*an*_ a awm tel tâk vang a ni a; _*min*_ hman a dik ta lo.

_1) Kan țhenawmten kan chhungkuain chaw eiah *mi* an rawn sâwm a._

Khitah khian keimah chauh ni lo, ka chhungte nena ka insawina, first person (plural) ka hmang a, chaw eia min sawmtute pawh pakhat aia tam an ni; mahse, _*mi*_ hman a dik ta a. A chhan chu; third person-ah khian personal pronoun (plural) _*an*_ a tel ve vang a ni.

_1) Kan țhenawmten kan chhungkuain chaw eiah *min* rawn sâwm a._

Khi khi keimah leh ka chhungte ka sawina, first person (plural) tho a ni a, _*min*_ hman a ngai ve ta thung. A chhan chu; min sawmtu third person atan khian personal pronoun (plural) _*an*_ a tel ve tâk loh avangin, plural form atan _*min*_ hman a ngai ta a ni.

*Chhinchhiah tur:*-

1. *Mi* hi first person (singular) a ni ringawt lo va, _*min*_ hi first person (plural) a ni ringawt lo bawk a. Khitiang khian kan thu chhehah, keimah chauh (singular) ka ni emaw, mi dang nen (plural) kan ni emaw pawh ni sela, kan lam hawia thil titu kha pakhat emaw, pakhat aia tam pawh ni mah sela, personal pronoun _*i*_ emaw, _*an*_ emaw a inzeh tel leh tel loh azir tein _*mi*_ leh _*min*_ hman hun hi a awm ta zawk a ni.

_________________________________