'Teho' leh 'hote'
- PC.Thangzikpuia.
TE:- Te hi pakhat aia tam sawina (plural suffix) a ni a, thu hnung beta hman țhin a ni. 'Ho' pawh hi pakhat aia tam sawina (plural suffix) a ni a, thu hnung beta hman țhin bawk a ni. An pahnih hian a inkawpa hman hun a awm ve leh bawk a ni.
1. Teho:- Hetianga kan hman chuan, 'te' hi thu zawmna (conjunction) a ni a, 'ho' hi plural suffix a ni thung. "Zuala te, Ruata te, Mawia teho nen kan inkâwm," tih ang chi-ah hian conjunction, 'te'-ah hian plural suffix 'ho' hi a rawn bet ta a ni.
"Ka țhianteho hi chu an fel asin!" tia pakhat aia tam sawi nâna noun thumal hnungah emaw, plural suffix atana hman kawp hi a dik lo a ni. 'Țhian' hi pakhat aia tamah kan chantir duh a nih chuan, "Ka țhiante..." tiin emaw, "Kan țhianho..." ti emawin 'ho' leh 'te' hi a mal ve vea hman tur a ni.
2. Hote:- Hetianga kan hman chuan, 'ho' hi noun a ni a, 'te' hi pakhat aia tam sawina (plural suffix) a ni thung. "Pu Hawla hote chu inthlan hmachhawn turin an inpuahchah mêk," tih ang chi-ah hian, noun 'ho'-ah hian plural suffix 'te' hi a rawn bet ta a ni.
"Kohhranhote" tih ang chia plural suffix hman double hi a dik lo a ni. "Kunga leh a hote pawh an lo lang e," tih ang chi-ah hian noun, 'ho' hi plural suffix 'te' hian pakhat aia tamah a rawn siam țhin zawk a ni.
3. Chhinchhiah tur:- 'teho' tih leh 'hote' tih hi pakhat aia tam sawi nân, plural suffix atân hman kawp chi a ni lo a ni.
....
No comments:
Post a Comment
Thurawn emaw siamṭhat ngai lai leh in zawhna te chu a chung ah khian ziak in in lo hnutchhiah zel dawn nia, rawtna leh fakselna eng pawh kan dawng sawng vek thei e.