'NÂN' HMAN DÂN TUR:

.

          *'NÂN' TIH THUMAL HI*

             - PC.Thangzikpuia
               (August 8, 2018)

'-Na' hi suffix a ni a, thu hnungah kan behtir țhin a, behna chu verbal noun-ah a chantir ṭhin. Tichuan, postposition 'atân' tih hian a zui ve țhin a, entir nân:

_1) Kan inhriat *rengna atân* hei hi ka pe ang che._

Khita 'rengna atân' tiha postposition, 'atân' tiha 'ata...' chin hi deletion rule an tih hmangin kan paih hlawk a. Tichuan, suffix 'na' khi switch rule an tih hmangin a awm hmun kan suan dawrh a, postposition hawrawp kan paih loh '...n' nen khian la kawpin kan țawngkama kan lo chelek țhin sa, 'nân' tia kai kawpin thumal kan chher ta a ni.

_2) Kan inhriat reng *nân* hei hi ka pe ang che._

Khitiang khian, 'inhriat rengna' tia verbal noun-a kan siam zet hnu a, postposition 'atân' hi zuitir kher tawh lovin, khitiang khian '...na atân' tlukpui thumal atân 'nân' hi kan lo hmang ta țhin a ni. Hei hi kan țawngkamah thumal ve renga kan neih tawh a nih avangin, hawrawp bânna dah a, 'nâ'n' tia ziah a ngai lo a. Suffix leh postposition la kawpa thumal hran kan chher liau liau a nih tawh avangin, 'nân' tia ziah hi a dik ta a ni.

"Kan chher," han tih hian, a hranpaa inrawt khawma he thumal hi chher tihna lam a kâwk lo a; 'nân' tih thumal hi a deep structure lam kan bih hnu a, a surface structure zawk kan neih dân kan chhui chianna leh sawi fiahna a ni e.

.....